இவர்கள் இன்று வந்தால்..!!!

                 புதுக்கோட்டை நகர் மன்றத்தில் 23.11.2013 அன்று நடந்த  திருக்குறள் கழக 59ஆவது ஆண்டுவிழாவில் புதுக்கோட்டை மணிமன்றத்தின் கலைப்பிரிவாகிய மணிச்சுடர் கலைக்கூடம் “இவர்கள் இன்று வந்தால்...!!!? “ என்னும் நடப்பியல் நாடகத்தை நடத்தியது.

                பாவலர் பொன்.கருப்பையா எழுதி இயக்கிய இந்த நாடகத்தில்  திருவள்ளுவர், பாரதி, பாரதிதாசன் ஆகியோர் இன்று வந்தால் இன்றைய சமுதாயத்தின் அவலங்கள் பற்றி என்ன சொல்வார்கள் என்பது பற்றி நகைச்சுவையுடனான  ஓரரங்கக் காட்சி அரங்கேறியது.

                தாய்மொழி வழிக்கல்வி சிதைப்பு, அந்நிய மோகம், பெண்ணடிமைத்தனம், அயலகங்களில் தமிழினப் பாதிப்பு, அண்டை மாநிலங்கள் தண்ணீர் தர மறுப்பு, இல்வாழ்க்கையின் இடர்கள் முதலியன பற்றிய இன்றைய நிலையும் அன்றைய அவர்களின் கருத்தும் நகைச்சுவையோடான  நடிப்புரையாடல் மூலம் பார்வை யாளர்களுக்கு வழங்கப்பட்டது.

               திருவள்ளுவராக பொன்.க.மதிவாணன், பாரதிதாசனாக கோ.வள்ளியப்பன், பாரதியாராக புலவர் மகா.சுந்தர்  மாங்காட்டுக் கூத்தனாக சிதம்பர ஈசுவரன், நல்லமுத்துவாக இராச.செய்சங்கர் ஆகியோர் சிறப்பாக நடித்திருந்தனர்.

            தோற்றப் பொலிவிலும் உரையாடலிலும், நடிப்பிலும் ஒருவரையொருவர் விஞ்சி நின்றனர்.   இசையமைப்பினை இராசசேகர் செய்திருந்தார்.

              35 நிமிடங்கள் காட்சி மாற்றமில்லாமல் தொடர்ந்து நடந்த இந்நாடகம் பார்வை யாளர்களால் மிகவும் பாராட்டப் பட்டது.

             சிறப்பு விருந்தினர்களாக வருகைதந்திருந்த  முனைவர் மறைமலை இலக்குவனார் இயக்குநரையும் பங்கேற்றவர்களையும் பாராட்டி ஆடை போர்த்திச் சிறப்பித்தார்.

            ஊடகவியலார் அய்யநாதன், பொறிஞர்  விடுதலை வேந்தன் , விருது பெற்ற முனைவர் திராவிடமணி, மருத்துவர் ச.இராமதாசு, அறமனச் செம்மல் சீனு சின்னப்பா, ஆலங்குடி இராமச்சந்திரன் செட்டியார், முத்துசீனிவாசன், கவிஞர் தங்கம் மூர்த்தி, கவிஞர் நா.முத்துநிலவன்ஆகியோர் பாராட்டினர்.

             கவிஞர் முத்துப் பாண்டி, வேதையன் மற்றும் புதுக்கோட்டை இலக்கிய அமைப்பினர், த.மு.எ.க.ச. வினர், மணிமன்றத் தலைவர் பொன்.பாலசுப்பிரமணியன், பொருளாளர் சுப.இராசேந்திரன், உறுப்பினர்கள் ஆ.செல்வராசு, கவிஞர் மு.கீதா, கவிஞர் செ.சுவாதி, வெ.பரமசிவம், கவிஞர் மா.கண்ணதாசன், இளங்கோ, தமிழ்மணி ஆகியோர் குறிப்பிடத்தக்க பார்வையாளர்கள்.

            ஒலி ஒளி அமைப்பினை சாந்தி ஒலியகத்தார் சிறப்பாகச் செய்திருந்தனர்.

            காணொளிப் பதிவினை மதி.பிறைநுதல்செல்வி செய்திருந்தார். ஒளிப்படப் பதிவினை டீலக்சு சேகர் செய்திருந்தார்.

பொன்விழா ஆண்டை நோக்கிய மணிமன்றப் பயணத்தில் இந்நிகழ்வு ஒரு குறிப்பிடத்தக்கப் பதிவாக அமைந்தது.

இன்றைய நாள்

1 .உலகம் முழுமையிலும் மனிதநேயமும் சமாதானமும் மலர, செஞ்சிலுவைச் சங்கத்தை நிறுவியவரும், ஜெனீவா ஒப்பந்தம் உருவாகக் காரணமாக இருந்தவருமான, ஜீன் ஹென்றி டுணான்ட் அவர்களின் நினைவுநாள் இன்று.

2. இயற்கையை தன் இறக்கைகளால் காத்துவரும் பல்லுயிர்க் காரணிகளான பறவைகள் நாள் இன்று. 

3. அந்நிய நுகர்வுக் கலாச்சாரத்தில் சிக்கி அன்றாடம் வாழ்க்கைப் போராட்டத்தில்  அடுத்த வேளை உணவுக்கு வழியின்றித் தவிக்கும் 63 விழுக்காடு மக்களுக்கு “அடுத்தவர்க்காகக் கடன் வாங்கியாவது கொண்டாடு தீபாவளியை... அதற்குப்பிறகு  ஆண்டு முழுவதும் திண்டாடு ... எனப் புளிச்சேப்ப ஆதிக்க வர்க்கம் பசிஏப்பக் காரர்களுக்கு உபதேசம்  செய்யும் “உலகச் சிக்கன நாள் ” இன்று. 

அடுத்த வீட்டுக்காரன் அவல் இடித்தால்... அவனுக்குப் போட்டியாகப் புளியங்கொட்டையையாவது  இடிக்க வேண்டுமெனப் புலியைப் பார்த்துச் சூடு போட்டுக்கொள்ளும் புனைகளாய் ஆகிப்போனோமே. என்று தணியும் ....?

மணிமன்றம்- பொன்விழா ஆண்டு திட்டமிடல் கூட்டம்

மணிமன்றத்தின் பொன்விழா ஆண்டு கொண்டாடுதல் பற்றி 29.10.2013 அன்று நேசனல் அகாதமியில் நடைபெற்ற திட்டமிடல் கூட்டத்தில் கலந்து கொண்ட கவிஞர் நா.முத்துநிலவன், நிறுவனர் பாவலர் பொன்.க , கவிஞர் ரெ.சு.காசிநாதன், புலவர் மகா.சுந்தர், மன்றத் தலைவர் பாலசுப்பிரமணியன் ஆகியோருடன் மகளிர் அணி இரா.நாகலெட்சுமி, கவிஞர்கள் மு.கீதா, செ.சுவாதி ஆகியோர்..

மணிமன்றம் - பொன்விழா ஆண்டு-செயல்திட்ட முன்வரைவு.

               29.10.2013 அன்று புதுக்கோட்டை நேசனல் அகாதமி அரங்கில் மணிமன்றம்- மரகதவள்ளி அறக்கட்டளையின் சிறப்புக் கூட்டம் மன்றத் தலைவர் பொன்.பாலசுப்பிரமணியன் அவர்கள் தலைமையி்ல் நடைபெற்றது.

            மன்றத் துணைத்தலைவர் நா.செந்தில பாண்டியன் வரவேற்புரையாற்றினார்.
துணைச் செயலாளர் மகா.சுந்தர் வேலை அறிக்கை வழங்கினார்.

          கடந்த கூட்டத்திற்குப் பின்னர் மன்றத்தின் செயல்பாடுகள், மன்ற உறுப்பினர்கள் பங்கேற்ற நிகழ்வுகள், பெற்ற சிறப்புகள் அறிக்கையில் அளிக்கப் பட்டது. உறுப்பினர்கள் கருத்துப் பகிர்விற்குப்பின்னர் அறிக்கை ஒப்புதலளிக்கப் பட்டது.

          மன்றப் பொருளார் சு.இராசேந்திரன் மன்றத்தின் நிதிநிலை அறிக்கையினை அளிக்க அவையினரால் ஒப்புதல் பெறப்பட்டது.

          மன்றத்தின் முதல் கூட்டப் பொருளாக, புதுக்கோட்டை திருக்குறள் கழகம் நவம்பர் 23ஆம் நாள் புதுக்கோட்டை நகர்மன்றத்தில் நடத்த உள்ள அவ்வமைப்பின் 59 ஆவது ஆண்டுவிழாவில் மணிச்சுடர் கலைக் கூடத்தின் நாடகம் நடத்தக் கோரிய வேண்டுகோள் பற்றிய உறுப்பினர்களின் கருத்துகள் கேட்கப்பட்டது. ஒப்பனை, இசை, ஒலியமைப்புச் செலவினங்களை திருக்குறள் கழகம் முழுமையாக ஏற்றுக் கொண்டு உரிய காலம் ஒதுக்கித் தர இசைவு தந்தால் ” இவர்களும் இன்றும்” என்னும் இலக்கியச் சார்பு குறுநாடகத்தினை நடத்துவது என்றும் அந்நாடகத்தில் ஏற்கனவே பங்கேற்றவர்களுடன் ஒரு மகளிர் பாத்திரம் படைத்து அதில் மன்ற மகளிர் ஒருவர் பங்கேற்பது எனவும் முடிவாற்றப் பட்டது.

          அடுத்ததாக மணிமன்றத்தின் ஐம்பதாம் ஆண்டு பொன்விழா நிகழ்வினைச் சிறப்பாகக் கொண்டாடுவது பற்றி மன்ற உறுப்பினர்களின் கருத்துகள் கேட்கப் பட்டது.
மன்ற உறுப்பினர்கள் அளித்த ஆலோசனைகளின் அடிப்படையில் கீழ்க்கண்ட முடிவுகள் மேற்கொள்ளப் பட்டன.

1. மணிமன்றத்தின் பொன்விழாவினை 2014 ஜுலை அல்லது ஆகச்டுத் திங்களில், இரண்டு அல்லது மூன்றுநாள் விழாவாக் கொண்டாடுவது.

2.  விழாவில் வழக்கமான முதல் மாணவர் விருது, முழுத்தேர்ச்சிப் பள்ளி விருது, அறிவியல் சாதனையாளர் விருதுகளோடு., சமுதாய மாற்றங்களுக்குச் சிறந்த பங்களிப்பாளர்களுக்குச் சமூகச் சாதனையாளர் விருதும் வழங்குவது.( அதிகமுறை குருதிக்கொடையளித்தோர், உடல், உடலுறுப்புக் கொடையாளர், விழிக்கொடையாளர்)

3.  விழாவில் இயல்,இசை, நாடக முக்கூறுகளை உள்ளடக்கிய, இளைஞர் இலக்கிய விழா, மக்களியக்க விழா, கலைவிழா என்னும் நிரலில் விழாவினை நடத்துவது.

4. மணிமன்ற ஐம்பதாவது ஆண்டுவிழாவில் “பொன்விழா மலர்“ வெளியிடுவது.
அம்மலரில் மன்றத்தின் உறுப்பினர்களின் படைப்புகள் ( சிறுகதை, கவிதை, நாடகம், நகைச்சுவை முதலியன), மணிமன்ற வரலாறு, கடந்துவந்த பாதை, ஆற்றிய சாதனைகள், மன்ற உறுப்பினர்களின் செயற்கரிய செயல்பதிவுகள்,படைப்பாளர்  மற்றும் நிகழ்வுச் சான்று ஒளிப்படங்களுடன் இடம்பெறச்செய்தல்.

    மலருக்கு  வணிக நிறுவனங்களின் விளம்பரங்கள் பெறுதல். 

5. பொன்விழாவில் புகழ்மிக்க முத்தமிழ் வித்தகர்களைச் சிறப்பு அழைப்பாளர்களாக அழைப்பது.

6. நிகழ்ச்சிக்கு தொலைக்காட்சி, வானொலி ஊடகவியலாரை அழைத்தல்.

இவை தவிர தொடர் நிகழ்வுகளாக...

7.  2014 சனவரித்திங்கள் முதல் புதுக்கோட்டை கல்வி நிறுவனங்களில் மன்றத்தின் சார்பாக தமிழகக் கலை மற்றுதட  பண்பாட்டினை வளர்க்கும் விழி்ப்புணர்வு நிகழ்வுகளை நடத்தி மாணவர்களைப் பங்கேற்கச் செய்தல். படைப்பாற்றல் வளர்த்தல்.

 ( கிராமியக் கலைகள், நாடகப் பயிற்சிப் பட்டறை, தாய்மொழி மேம்பாட்டுத் திறன் வெளிப்பாடுப் போட்டிகள் முதலான )

8.  ஊரக அண்மைக் கிராமங்களில் சுகாதார விழிப்புணர்வு நிகழ்ச்சிகள் நடத்துதல்.

 (சுற்றுச் சூழல் பாதுகாப்பு, வருமுன் காப்போம், நமதுநலம் நமது கையில், நீர்ச் சிக்கனமும் சேமிப்பும், மதுவின் கேடுகள் - பற்றிய கலைநிகழ்ச்சிகள் . இசை,தெருமுனை நாடகம், துண்டறிக்கைகள், காணொலிக் காட்சிகள் மூலம் )

9. 2014 சனவரி முதல் 2014 சூன் திங்களுக்குள் நகர் மற்றும் புறநகர்ப் பகுதிகளில், கல்வி நிறுவனங்களில 50 ஆயிரம் மரக்கன்றுகள் நடுதல்.

மேற்கண்ட முடிவுகளைத் தொடர்ந்து, பொன்விழா மலர்க்குழு அமைப்பது தொடர்பான ஒருங்கிணைப்பாளராகக் கவிஞர் நா.முத்துநிலவன் அவர்களை இப்பொதுக்குழு முன் நிறுத்துகிறது. அடுத்த கூட்டத்தில் குழுக்கள் இறுதி செய்யப்படும்.

நிறைவாக உறுப்பினர் கோ.வள்ளியப்பன் அவர்கள் நன்றி கூறக் கூட்டம் இனிதே நிறைவுற்றது.

மன்ற உறுப்பினர்கள் தங்கள் படைப்புகளை, தங்களது ஒளிப்படம் மற்றும் அறிமுகக் குறிப்புகளுடன்  நா.முத்துநிலவன் , 96, சீனிவாச நகர், 3ஆம் வீதி, மச்சுவாடி, புதுக்கோட்டை என்ற முகவரிக்கோ, muthunilavanpdk@gmail.com என்ற மின்னஞ்சலுக்கோ அனுப்பிடக் கேட்டுக்கொள்ளப் படுகிறார்கள். மேலும் தொடர்பிற்கு பாவலர் பொன்.க.9442211096, நா.முத்துநிலவன்  9443193293 .

பாரதியார் நினைவு நாள் வழக்காடு மன்றம்

            11.09.2013 அன்று புதுக்கோட்டை நேஷனல் அகாதமி அரங்கில், மணிமன்றம்-மரகதவள்ளி அறக்கட்டளை ” பாரதியார் கனவு கண்ட சமுதாயம் மலரவில்லை” என்னும் வழக்காடு மன்ற நிகழ்வினை நடத்தியது.

            நிகழ்ச்சிக்கு மன்றத் தலைவர் பொன்.பாலசுப்பிரமணியன் தலைமை வகித்தார்.

           மன்றச் செயலாளர் திரு சிதம்பர ஈசுவரன் பாரதியார் பாடலோடு வரவேற்புரையாற்றினார்,இந்நிகழ்வில் மன்ற உறுப்பினர்களே பங்கேற்றனர்.

         வழக்காடு மன்ற நடுவராக முனைவர் வீ.கே.கஸ்தூரிநாதன் அவர்கள் இருந்தார். 

          பெண்சமத்துவம், தாய்மொழி, சமதர்ம சமுதாயம் பற்றிப் பாரதியார் கண்ட கனவுகள் நனவாக வில்லை எனக் கவிஞர் மு.கீதா, திரு கோ.வள்ளியப்பன் ஆகியோர் வழக்குத் தொடுத்தனர்.

         புலவர் மகா.சுந்தர், கவிஞர் செ.சுவாதி ஆகியோர் வழக்கினை மறுத்தனர்.
இருசாராரும் பாரதியாரின் கவிதைகளையும் இன்றைய சமுதாய நிகழ்வுகளையும் சான்றுகாட்டி வாதிட்டனர்.

         வழக்கிளை ஆய்வு செய்த நடுவர், பெண்களின் இன்றைய அனைத்துத் துறை முன்னேற்றம், தமிழ்மொழி ஆட்சிமொழி, மருத்துவ, வழக்காடுமன்ற கணினி  மொழியாக வளர்ந்திருப்பது, சமதர்ம வளர்ச்சி இவற்றை ஒப்புநோக்கி, பாரதியார் கண்ட கனவு நனவாகி வருகிறது எனத் தீர்ப்பளித்து வழக்கினைத் தள்ளுபடி செய்தார்.

        நிகழ்ச்சிக்கு வருகைதந்த சிறப்பு அழைப்பாளர்கள் கவிஞர் நா.முத்துநிலவன், திருவருள் பேரவைத் தலைவர் இரா.சம்பத்குமார் , எழுத்தாளர் கிருஷ்ணவரதராசன் ஆகியோர் வழக்காடு மன்றம் பற்றிய கருத்துகளைப் பதிவு செய்து வழக்காடு மன்றத்தில்

பங்கேற்றவர்களுக்கு நூல்களைப் பரிசாக வழங்கிச் சிறப்பித்தார்கள்.

        நிகழ்ச்சியினை ஒருங்கிணைத்திருந்த மணிமன்றம்-மரகதவள்ளி அறக்கட்டளையின் நிறுவனர் பாவலர் பொன்.கருப்பையா அவர்கள் நன்றி கூறினார்.

        தொடர் மழையிலும், நிகழ்ச்சிக்கு மணிமன்ற உறுப்பினர்கள் நா.செந்தில்பாண்டியன், கவிஞர் கண்ணதாசன் , மணிகண்டன் ஆகியோரோடு, முத்துப் பாண்டியன், நண்பா அறக்கட்டளை கார்த்திக், நேஷனல் அகாதமி நாகரெத்தினம் மற்றும் இலக்கிய ஆர்வலர்கள் வருகை தந்தது சிறப்பு.

       மணிமன்றப் பொன்விழா ஆண்டின் தொடக்க நிகழ்வு ஒரு பொது நிகழ்வாக நடந்தது குறிப்பிடத் தக்கது. இந்நிகழ்வின் போது கவிஞர் நா.முத்துநிலவன் அவர்கள் மன்ற உறுப்பினராகத் தன்னை இணைத்துக் கொண்டது  மன்றத்திற்கு மேலும் பெருமை சேர்க்கும்.  

நன்றி அறிவிப்பு -49

தி.பி.2044 கடகம் 19 ஆம் நாள் ( 04.08.2011 ) நடைபெற்ற மணிமன்றம்-மரகதவள்ளி அறக்கட்டளையின் 49 ஆம் ஆண்டு முப்பெரும்விழா - நன்றி அறிவிப்புக் கூட்டத்தில் கலந்து கொண்டவர்கள் .

விழா - 49 நன்றி அறிவிப்புக் கூட்டம்

             புதுக்கோட்டை மணிமன்றம்- மரகதவள்ளி அறக்கட்டளையின் 49 ஆவது ஆண்டு முப்பெரும் விழா தொடர்பான நன்றி அறிவிப்புக் கூட்டம் தி.பி 2044 கடகம் 19 ஆம் நாள்          ( 04.08.2013 ) மாலை மணிமன்றத் தலைவர் திரு.பொன்.பாலசுப்பிரமணியன் அவர்கள் இல்லத்தில் அவர் தலைமையி்ல் நடைபெற்றது. மன்றத் துணைத் தலைவர் திரு நா.செந்தில்பாண்டியன் அவர்கள் வரவேற்புரையாற்றினார்.
கூட்டத்தின் பொருள் 
                                              1. ஆண்டுவிழா பற்றிய கருத்துப் பகிர்வு
                                              2. நன்றி அறிவிப்பு
                                              3. வரவு செலவு ஒப்புதல்
                                              4. அ.பெ.கா  அமைப்பில் நாடகம்
                     முதலாவதாக 49 ஆவது ஆண்டு முப்பெரும் விழா தொடர்பான உறுப்பினர்களின் கருத்துகள் பதிவு செய்யப்பட்டன.

                    மன்றச் செயலாளர் சிதம்பர ஈசுவரன், விழா பொதுவாக சிறப்பாக கடந்த ஆண்டைக் காட்டிலும் சிறப்பாக இருந்ததையும், அரங்கேற்றம் செய்யப் பட்ட நாடகம் இன்னும் பயிற்சி அளிக்கப் பட்டிருக்க வேண்டும் என்பதையும் நிருவனரின் பெருமுயற்சியோடு அனைவரின் கூடுதல் ஒத்துழைப்புத் தேவை என்பதையும் பதிவு  செய்தார்.

                  கவிஞர் மு.கீதா அவர்கள் அரசுப் பள்ளி முதல்மாணவர்களுக்கு விருதுகள் வழங்கப்பட்டதும் முழுத்தேர்ச்சி பெற்ற அரசுப் பள்ளிகளுக்கு விருதுகள் வழங்கப்பட்டதையும் பாராட்டினார். ஒரு விழா எப்படி நடக்க வேண்டும் என்பதைத் திட்டமிட்டு நடத்தியமை சிறப்பு என்பதையும் பதிவு செய்தார்.

                 கோ.வள்ளியப்பன் தனது கருத்தாக கடந்த ஆண்டினைக் காட்டிலும் அதிகமான அரசுப் பள்ளி மாணவர்களுக்கும் முழுத்தேர்ச்சி அரசுப் பள்ளிகளுக்கும் விருதுகள் வழங்கப்பட்டது சிறப்பு என்பதையும். புதிய கண்டுபிடிப்பு மற்றும் மாணவச் சாதனையாளர்களுக்கு இது போல யாரும் விருதுகள் வழங்கியது இல்லை என்பதையும் பதிவு செய்தார்.

                  கோகர்ணேசன் தனது மாணவப் பருவத்திலிருந்து மன்றத்தின் மூலம் இத்தகு சேவையில் ஈடுபட்டு வருவதையும், தனது குடும்ப மற்றும் தொழில் நெருக்கடி காரணமாக கடந்த ஆண்டுகளைப் போல முழுமையான ஒத்துழைப்பு கொடுக்க முடியாமைக்கு வருந்தியும் தனக்களி்க்கப்பட்ட அன்றையப் பணிகளை செவ்வனே முடித்தமையையும் கூறினார்.

                  கண்ணதாசன் ,கல்வி மற்றும் சமூக சேவை செய்யும் மன்றத்தின் செயல்களால் ஈர்க்கப் பட்டுத் தானாக இம்மன்றத்தில் இணைந்ததையும், நிருவாகியின் தனித்தமிழ்ப் பற்று மற்றும் விடாமுயற்சியாலும் இது போன்ற சேவையினைத் தொடர்ந்து ஆற்ற முனைவதாகக் கூறினார். விருதுகள் வழங்கிய கைப்பையில் மன்றத்தின் பெயர் பொறித்திருக்கலாம் என்ற ஆலோசனையினையும் பதிவு செய்தார்.

                   இரா.சங்கரநாராயணன் தனது கருத்தாக. இவ்வாண்டு விழாக்களை விட மிகச் சிறப்பாக இருந்ததாக பார்வையாளர்கள் கருதியதைப் பதவு செய்தார். 

                 நா.செந்தில் பாண்டியன் தான் நீண்டகாலப் போராட்டத்திற்குப் பிறகே இம்மன்றத்தில் இணைய முடிந்தது என்பதையும். இணைந்த பின்னர் தனக்களிக்கப்பட்ட எந்தப் பணியையும் தாழ்வின்றிச் செய்து வருவதாகக் கூறினார். மேலும் இத்தகு சேவையினால் பொதுவாழ்க்கையில் தனது செயல்பாட்டில் மதிப்பு மிகுவதாகப் பெருமை கொண்டார். விருது பெற்றவர்கள் தனது பெற்றோர்களுடன் வந்து விருது பெற்றதைப் பெருமையாகக் கருதினர் என்பதைப் பதிவு செய்தார். விழாவில் முதன்மைக் கல்வி அலுவலரின் உரை மாணவர்களுக்குப் பயனுள்ளதாக இருந்ததாகக் கூறினார்.

                புலவர் மகா.சுந்தர் கருத்துரைக்கையில் விழாவின் சிறப்பிற்கு ஒலி.ஒளி சிறப்பாக அமைந்தமையைச் சுட்டிக்காட்டினார். முதன்மைக் கல்வி அலுவலர் தனது சொந்த வாழ்க்கைப் பட்டறிவின் மூலம் மாணவர்களுக்குக் கருத்துரைத்தமையையும், அழைத்ததும் வந்து நிறைவுவரை அலுவலர் இருந்து சிறப்பித்ததையும் நெகிழ்வுடன் பதிவு செய்தார். மன்ற பேச்சில்லா நாடகம் இன்னும் சிறப்பாக அமைத்திருக்கலாம் என்பதையும் கருத்தாகச் சொன்னார்.

                மன்ற மூத்த உறுப்பினர் ஆ.செல்வராசு தனது கருத்தாக ஆண்டுக்காண்டு மெருகேறிவரும் மன்றத்தின் செயல் கிராமப்புறப்  பொதுமேடையில் நடத்தப் பட்டால் இன்னும் மன்றத்தின் செயல்பாடுகள் பரவும் என்பதைக் கூறினார்.

              நிறைவாக மணிமன்றம்-மரகதவள்ளி அறக்கட்டளையின் நிறுவனர் பாவலர் பொன்.கருப்பையா, இவ்வாண்டு முப்பெரும் விழா சிறப்பாக நடக்க ஒத்துழைத்த அனைத்து மன்ற உறுப்பினர்களுக்கும்,  சிறப்பு விருந்தினர்களாகக் கலந்து கொண்ட முதன்மைக் கல்வி அலுவலர் , முதுநிலை அறிவியலறிஞர் திரு.இரா.இராஜ்குமார். பாரதிதாசன் பல்கலைக் கழக ஆட்சி மன்ற உறுப்பினர் கவிஞர் தங்கம் மூர்த்தி, த.மு.எ.க.ச மாநிலத் துணைத் தலைவர் கவிஞர் நா.முத்து நிலவன், மருத்துவர் இராமதாசு ஆகியோர்க்கும் , முன்னிலையேற்ற சுப்பிரமணிய காடுவெட்டியார், ஆர் ஏ.குமாரசாமி ஆகியோர்க்கும் , கேளாமலேயே நன்கொடையளித்த பொது நன்கொடை யாளர்களுக்கும், குறிப்பாக ஆண்டுதோறும் கட்டணமில்லாது அரங்கத்தினை வழங்கிவரும் எஸ்.வி.எஸ்.செந்தில் ஆண்டவர், விழாவிற்கு வருகை தந்தவர்க்கெல்லாம் சிற்றுண்டி வழங்கிய திரு சண்முக பழனியப்பன், இனிப்புகள் வழங்கிய அறமனச் செம்மல் சீனு .சின்னப்பா, ரொட்டிகள் வழங்கிய கோடீசுவரா அழகப்பன், விருதுகளுக்கு நிதி யளித்த எஸ.வி.எஸ். செயக்குமார். முரு.வைரமாணிக்கம்,  பரப்புரைக்கு உதவிய வயி.ச.வெங்கடாசலம். மருத்துவர் ச.இராமதாசு, ப.இராமசாமி, ஆர்.ஏ.குமாரசாமி. சுந்தரமூர்த்தி ஆகியோர்க்கும், பொருளாலும், உடலுழைப்பாலும், நிதியாலும் உதவிய மன்ற உறுப்பினர்களுக்கும் ஒளிப்படம் எடுத்த ஸ்டீபன், காணொளிப் பதிவு செய்த மரகதவள்ளி அறக்கட்டளை அறங்காவலர் பொன்.க.மதிவாணன், விருதுபெற்ற மாணவர்கள், பெற்றோர், தலைமையாசிரியர்கள், விழாவிற்கு வந்து சிறப்புச் செய்த புதுக்கோட்டையில் பல்வேறு இலக்கிய , அறிவியல். கலைஇலக்கிய அமைப்பினைச் சேர்ந்தவர்களுக்கும். நிகழ்ச்சியினை நாளேடுகளில் வெளியிட்டு உதவிய நாளேட்டுச் செய்தியாளர்களுக்கும், திருச்சி அகில இந்திய வானொலி, காவல்துறை ஆகியோர்க்கு அமைப்பின் சார்பான நன்றிகளைப் பதிவு செய்தார்.

             அடுத்து வரும் நிகழ்வுகளில் இன்னும் ஆற்றலோடு உறுப்பினர்கள் பணிகளைப் பகிர்ந்து சிறப்பிக்க வேண்டுகோளையும் வைத்தார்.

              பொருளாளர் வரவு செலவு அறிக்கை அளிக்கப் பட்டு மன்றத்தினரின் ஒப்புதல் பெறப்பட்டது.

              அ.பெ.கா.அமைப்பினர் கோரிய நாடகத்தில் நடிக்க மன்ற உறுப்பினர்களின் ஒப்புதல் கோரப்பட்டது. நாடக வடிவமைப்பு, உரையாடல், பங்குபெறுவோர் எண்ணிக்கை உரியவர்களிடமிருந்து பெறப்பட்டதும் உறுப்பினர்களின் ஒப்புதலை உறுதிசெய்ய முடிவாற்றப் பட்டது.

             நிறைவாக மன்றச் செயலாளர் சிதம்பர ஈசுவரன் நன்றி கூற கூட்டம் இனிதே நிறைவுற்றது.